Bertsos - View details To know more about this section
1999-08-17 Goizueta Jaialdia [Bertsoa] / Estitxu Arozena, Sebastian Lizaso
| Bertsoa entzun |
1999-08-17 Goizueta Jaialdia [Bertsoa] / Estitxu Arozena, Sebastian Lizaso
Stanza name:
Zortziko handia (hg) / Lau puntuko handia (ip)
Localization:
XDZ - Xenpelar Dokumentazio Zentroa
S.Lizaso:
Umetatikan hartuemana
oinarri edo zutabe,
ta ezkontzeko planak eginda
bada hainbat nobedade.
Ezin ezkondu, dirudienez
anai-arrebak gerade,
elkar maitatzen segi dezagun
papelikan ere gabe.
E.Arozena:
Paperik gabe elkar bizitzen,
hortan bota duzu nahiko;
orain artean uzten genuen
egun haundi hau biharko,
baina ezkontzak zeozer dakar
ta hori aitortu beharko,
gauzak argitu beharko dira
umeak izaterako.
S.Lizaso:
Izaten zaila izango degu,
horretan dago kakoa,
izan ta haurra ez baita izango
nahi degun bezelakoa.
Azken batean argitu behar
senidetasun jokoa:
odola degu berdina eta
bihotza ere antzekoa.
E.Arozena:
Bihotza dugu antzekoa ta
odola bataz besteko,
nere ustetan gauza horiek
pentsatu behar hobeto.
Gero berandu izan daiteke
guk eginaz damutzeko,
morbo gehiegi daukanez honek
gauza ongi ateratzeko.
S.Lizaso:
Ez da erreza elkarrizketan
gai honi buruz jarduten,
azken boladan ohituak gaude
gauza berriak entzuten.
Galdera bat dut nere buruan,
inork ez dit erantzuten,
orain artean gordea zena
zergatik esan diguten.
E.Arozena:
Orain artean gordea zegon
ta orain atera da saltsa,
gaurtik aurrera ez dugu eginen
lehen bezain umorez dantza.
Gauzak ilunak ikusi arren
nik badaukat esperantza,
igual paperen akatsa dugu
ta ez bihotzen akatsa.