Bertsos - View details To know more about this section
2001-12-02 Tolosa Txapelketa [Bertsoa] / Mikel Mendizabal, Fredi Paia
| Bertsoa entzun |
2001-12-02 Tolosa Txapelketa [Bertsoa] / Mikel Mendizabal, Fredi Paia
Stanza name:
Zortziko handia (hg) / Lau puntuko handia (ip)
Localization:
XDZ - Xenpelar Dokumentazio Zentroa
F. Paya:
Fabrika baten behar eginez
pasatu ohi dut eguna,
gogorra baita makina artean
langilearen jarduna;
amaitu eta kokoteraino
etxera bidai txukuna...
Zein ederra den gauez heltzean
maitean berotasuna! (bis)
Mendizabal:
Zuk diozunez aurkitzen zera
norbaiten maitasunean,
bainan nik ere bilatu ohi det
tokatzen zaidan unean.
Zertan ibili konbibentziak
duen estuasunean?
Bakardadea lagun ona da
desiatzen dezunean. (bis)
F. Paya:
Ez zait gustatu niri sekula
ermitainoen konduta:
etxe haundi ta hotzen barruan
neurria ezin hartuta.
Gauez ederra ohe barruan
maitearekin burruka...
Oraindik zuk lo eiten al duzu
pelutxea oratuta? (bis)
Mendizabal:
Nahi dan garaian oheratuta
goiza pozez argitzea,
nik gauza horri esaten diot
zoriontsu bizitzea;
eta zuk dezun zoritxar hori
nahiko nuke aipatzea:
aldamenean beti norbait ta
bakarrikan sentitzea. (bis)
F. Paya:
Bakarrik bizi ta bakarrik lo,
ene jaunak, hau da nazka!
Zeozer egin behar dugu Mikel,
nabil buruari hazka.
Ideia on bat daukat zuretzat
okurritu berri, zazta!:
Mikel, aurkeztu behar dizut nik
nire maitearen ahizpa. (bis)
Mendizabal:
Eskerrik asko, estimatzen det
daukazun borondatea;
bide hortatik ez nijoala
Fredi ohartu zaitea.
Ez zait gustatzen gauero inori
nere kontu ematea
eta gainera ez dut desio
zure koinadu izatea. (bis)