Bertsos - View details To know more about this section
2001-04-28 Urretxu Txapelketa [Bertsoa] / Iñigo Izagirre, Aitor Mendiluze
2001-04-28 Urretxu Txapelketa [Bertsoa] / Iñigo Izagirre, Aitor Mendiluze
Stanza name:
Zortziko handia (hg) / Lau puntuko handia (ip)
Localization:
XDZ - Xenpelar Dokumentazio Zentroa
MENDILUZE:
Gu arrantzuan aritzen gera
berdin gau eta egunez,
bainan ez gera aberastuko
modu honetan jardunez.
Itsaso hontan bota sareak,
hala agintzen duzunez;
zer aurkitu nahi duzun dakizu
zer aurkituko duzun ez. (bis)
IZAGIRRE:
Une honetan joan nahi nuke
esperantzatik harago,
gure azpian egon liteke
uste baino arrain gehiago;
sareak ere ekaitzarekin
bete litezke oparo;
heriotzakin jolastu ezean
bizitzarikan ez dago. (bis)
MENDILUZE:
Beraz ezin da inola bizi
ezer jokatu ezean,
uste al dezu ari gerala
hemen denbora pasean?
Ilunabarrak lanean hartu
hasi geranak goizean;
gu arrantzuan fin ari gera,
zu zabiltza jolasean. (bis)
IZAGIRRE:
Ni jolasean hasita nago,
derrigorra det ordea;
barkua hutsik edukitzea
ez da gauza dotorea
eta betea eraman nahi det
arrain pilakin gordea;
edozer gauzan gainetik dago
patroiaren ohorea. (bis)
MENDILUZE:
Zure ohore ta zure famak
noski ez dauka berdinik,
zure ondora etortzerako
horren berri banuen nik;
aberastea desio dezu
arrantza haundia eginik,
bainan ez dezu lonjan jasoko
gure bizien ordainik. (bis)
IZAGIRRE:
Joan ta joan iritsi gera
gu ekaitzaren ertzera,
hementxe degu aukera eta
ezin degu jo atzera.
Aizu, marinel, ez zaitez jarri
orain koldarren antzera;
nik lotsagarri momentu hontan
ez det heldu nahi etxera. (bis)