Bertsos - View details To know more about this section
1990-06-28 Zarautz Jaialdia [Bertsoa] / Andoni Egaña, Gregorio Larrañaga "Mañukorta", Anjel Mari Peñagarikano, Jokin Sorozabal, Millan Telleria
| Bertsoa entzun |
1990-06-28 Zarautz Jaialdia [Bertsoa] / Andoni Egaña, Gregorio Larrañaga "Mañukorta", Anjel Mari Peñagarikano, Jokin Sorozabal, Millan Telleria
Stanza name:
Hamarreko handia (hg) / Bost puntuko handia (ip)
Localization:
XDZ - Xenpelar Dokumentazio Zentroa
Egaña
Itxuraz oso bizitza ona
baina izatez txepela,
bertsolarien bizimodua
askotan degu ustela,
beti batetik bestera gabiltz
ezin da izan bestela,
etxean ere sartzen gerade
nahiko honela-horrela,
alabak ere pentsatutzen du
bere osaba nauela.
Mañukorta
Bertsozale ta bertsolariak
ditu bere arrazoiak,
kantatu nahia nunnahitan dauka
bertsolarian sasoiak,
ordu txikiak aurrera doaz
berdin azpi eta goiak,
barkaziorik nola ez daukan
gure lantegi kabroiak,
oporrak hartzen ari dituk oin
Mañukorta honen oiak.
Peñagarikano
Gure amatxok bere etxean
prestatzen ditu lentejak,
ta handik kanpo jaten ditugu
langostino ta almejak,
baina ez pentsa benetakoak
diranik jiji ta jajak,
etxetik kanpo gabiltzala ta
gure maitearen kejak,
alproja fama daukagu baina
ez gera horren alprojak.
Sorozabal
«Bertsolariak alprojak dira»
zenbat aldiz honezkero,
entzuten degun ta batez ere
parranda egin da gero,
Peñari amak sortzen dizkio
ez dakit zenbat enredo,
gero goizean lanera joan da
han nagusiak espero,
nik amarena egingo nuke
haiena egin ezkero.
Telleria
Bosterdietan jeikitzen naiz ta
ni lantegian lehena,
egunero nik zortzi ordu lan
egiten ditut barrena,
bazkaldu eta haurrei pasea
ematen diet hurrena,
pakete jarri biberoia eman
hori det lan nabarmena,
holakoxea izaten det nik
nere egunik onena.
Egaña
A zer gogoa izaten degun
sarritan ohian sartzeko,
asteburua iritsi eta
deskantsutxo bat hartzeko,
azken batean gu ez baigera
ez kanpoko, ez etxeko,
ta mahaian ere serbitu arren
faraoi batzu(re)n antzeko,
langostino asko jan behar dira
ogia etxeratzeko.
Mañukorta
Negar egiten hasterik jaunak
gaurkuan ez du merezi,
jai giro eta gauza on asko
egiten dira ikusi,
erne gauetan zerbait esaten
hola e(g)iten gera hasi,
lagun arte ta talde jatorrak
nonnahitan dira berezi,
ondo jan eta edan eginez
ez gera oso gaizki bizi.
Peñagarikano
Kantatu eta pezeta batzuk
ari gera manejatzen,
Mañu eta ni gordo ta flako
ta ez degu enkajatzen,
aspalditxoan ez al naiz ai hemen
argaltzen edo ajatzen,
lehen gizona ta indartsu nitzan
ta hasia nago bajatzen,
ni kejatzen naiz baina hala ere
behar hainbat ez naiz kejatzen.
Sorozabal
Peñak sufritu duen guztia
behar litzake txalotu,
oraindik ere bere kilotan
sartzerik ez baidu lortu,
bizimodu hau bezin gogorrik
oraindikan ez da sortu,
astea pasa lanean eta
jaietan bertsoei lotu,
aste guztian nekatu eta
aste buruan erotu.
Telleria
Lan xelebre hau hartu nunean
mutiko gaztea nitzan,
eta geroztik sufrimentua
franko joan da bizitzan,
ni iluntzero etxeratzen naiz
beti nekatuen gisan,
ta andrea han ohean zai ta
zerbait nahi al dezu esan,
harena ere kunplitu behar
gaizki pentsatu ez dezan.