Bertsos - View details To know more about this section
2005-11-06 Hendaia Txapelketa [Bertsoa] / Amaia Agirre, Jon Martin
Bertsoa entzun |
2005-11-06 Hendaia Txapelketa [Bertsoa] / Amaia Agirre, Jon Martin
Stanza name:
Zortziko txikia (hg) / Lau puntuko txikia (ip)
Localization:
XDZ - Xenpelar Dokumentazio Zentroa
J. Martin:
Ozeano haunditan
egin dugu txango
igotzeko aukera
al dizut emango?
Barkutan ezin dugu
eduki ke frango
aizu erretzailea
ez zera izango? (bis)
A. Agirre:
Nahiz eta iruditu
arrazoi leguna
ni marinel bat nauzu
fina ta txukuna
ta zure aurpegia
joño ezaguna!
Zu ez al zera atzo
bota ninduzuna? (bis)
J. Martin:
Zu hiltzeko banuen
prestatuta plana
ta ekarri zintudan
irla honengana
bai ni naiz hemen soilik
utzi zintuana
eta denborak egin
beza bere lana. (bis)
A. Agirre:
Kapitain agurgarri
nere goraintziak
geratzeko badauzkat
oraindik antsiak
faktura pasako du
ni hemen utziak
ni goseak hilko nau
ta zu kontzientziak. (bis)
J. Martin:
Kontzientzia ez daukat
batere noblea
zuk duzu uste baino
itxura hobea
irla batean zaude
bakarti gordea
goseti itxurarik
ez duzu ordea. (bis)
A. Agirre:
Grazioso zatoz baina
ez zazula uste
nik bueltan ere badet
hamaika albiste.
Guri-guria nago
sasoiko ta gazte
lasai aguantauko det
beste hiru aste. (bis)
J. Martin:
Palmera eta koko
kuban berdintsua
ezin diozu izan
ezeri izua
ta gainera debalde
galtzen da pisua
horrelako zeozer
da paradisua. (bis)
A. Agirre:
Ni umilatu nahian
zatoz itsu-itsu
lasai segi ezazu
nagusi berritsu.
Nere premia dezu
ondo badakizu
nahi bazu bueltakoan
jaso nazakezu. (bis)