Bertsoak - Fitxa ikusi Atal honi buruz gehiago jakiteko
2022-09-24 Getxo Txapelketa [Bertsoa] / Oihana Bartra, Nerea Elustondo
| Bertsoa entzun |
2022-09-24 Getxo Txapelketa [Bertsoa] / Oihana Bartra, Nerea Elustondo
Neurria:
Zortziko handia (hg) / Lau puntuko handia (ip)
Kokapena:
XDZ - Xenpelar Dokumentazio Zentroa
O. Bartra
Nola naturak ematen zigun
momentu baten bizkarra
lagundutako ugalketakin
asetu genuen harra
ta sentitzen dut hau inguruan
nik konpartitu beharra
ama izateko eduki dugun
aukera bakar-bakarra.
N. Elustondo
Bi ama izanik aukera hori
bakarrik dugu iraupen
nahiz eta adi egon natzaizun
zure alboan entzuten
zertan aritu gure bideak
kontatzen eta erruten?
Besteek ere ez dute esaten
nola enkargatu duten.
O. Bartra
Lehen aukera lez adopzioa
halan genuen aztertu
ta bigarrena in vitroa zen
eta biok geunden gertu.
Ezin zen eta azkenerako
nekatu eta aspertu
eta ulertu nahi ez duenak
ba ez dezala ulertu!
N. Elustondo
Bakar-bakarrik ezin gendula
guztiek dakite jakin
ume bat nola ezin den izan
bi obuluren etekin.
Hala ta guztiz kontatzeari
zer dela-ta hemen ekin
arazo haundina neronek badet
besteen begiradarekin?
O. Bartra
Gu pixkanaka hor egon gara
etapa guztiak errez
ta beste batzuk ugaldu eta
dana egiten dute errez
“Haurra erosi egin duzue”
esaten dute haserrez
nik inori ez diot esaten
zer erosi eta zer ez!
N. Elustondo
Baina besteen bizia neurtzen
aritzen gara oparo
nahiz ezezkoa eztabaidatzen
aritu naizen luzaro
bale amore emango dut nik
ezin dut eutsi gehiago
zu zoriontsu ikustearren
edozertako prest nago.
Datu-base honetan eskainitako informazioari buruz jakiteko, kontsultatu lege oharra