Bertsoak - Fitxa ikusi Atal honi buruz gehiago jakiteko
2001-12-01 Bilbo Txapelketa [Bertsoa] / Unai Iturriaga, Jon Maia
Bertsoa entzun |
2001-12-01 Bilbo Txapelketa [Bertsoa] / Unai Iturriaga, Jon Maia
Neurria:
KOPLEN MULTZOA
Kokapena:
XDZ - Xenpelar Dokumentazio Zentroa
Iturriaga:
Oraintxe dugu tartea
ta komeni da esatea
nahiko nukeela biok manifa
berera joatea.
Baina, ai lagun maitea,
dena tiro, dena kea,
ez dut sinisten hortik etorri
leikenik bakea. (bis)
Maia:
Ezin ginenak ingura
geure etxean barrura,
orain berriro elkarrizketa
daukagu eskura;
eta garaia heldu da
kentzeko, ahal den modura,
Beasain eta Baiona arteko
ideologi muga. (bis)
Iturriaga:
Denok gara hanka biko,
jakina dugu mutiko,
jokaera batzuk hala guzti
ez ditut begiko.
Zuk zeureai eutsi tinko:
herria lehenik betiko...
Heriotzaren bidetik ez da
bizia etorriko! (bis)
Maia:
Diskurso hori da motza
ta gainera oso hotza;
gure artean egin dezagun
egizko aitortza.
Zuk badezu zertaz lotsa,
tiroa ez dezu arrotza,
bakarrik gure patrimonio
ez da heriotza. (bis)
Iturriaga:
Lehenengo ziren karguak,
pasatu ahala orduak
nora bajatu garen ez digu
esan akorduak.
Ai, gure hilotz karruak!
Onartu zeure erruak;
zuri norbaitek agintzen dizu
ta niri barruak. (bis)
Maia:
Hoiek dira kontu hitsak,
oso ideia murritzak,
berdin du armak nork dauzkan: ETAk
edo Jaurlaritzak;
mantendu beti bizitzak,
jarri ditzagun baldintzak,
pistolak isil daitezen eta
mintzo bitez hitzak. (bis)
Datu-base honetan eskainitako informazioari buruz jakiteko, kontsultatu lege oharra