Bertsoak - Fitxa ikusi Atal honi buruz gehiago jakiteko
2007-12-16 Donostia Txapelketa [Bertsoa] / Aitor Sarriegi
2007-12-16 Donostia Txapelketa [Bertsoa] / Aitor Sarriegi
Neurria:
Hamaseiko handia (hg) / Zortzi puntuko handia (ip)
Kokapena:
XDZ - Xenpelar Dokumentazio Zentroa
Berrogei urte bete berriak
emakume euskalduna.
Bizi lasaia eraman asmoz
ni eta nere laguna;
Aspaldidanik nahi izan dugu
biok genbiltzan zer suma...
Halere ez zen inoiz betetzen
geneukan amets kuttuna.
Azkenerako bizi osoa
ikusten nuen iluna
ametsa bete gabe amestuz
gu bion etorkizuna.
Kostatu zaio baina azkenik
iritsi zaigu gutuna;
ireki zazu nere laztana
ea zein den erantzuna.
Aldez aurretik egin ditugu
hamaika proba arraro;
ez da alperrik hasieratik
ia bost urte igaro.
Biok geunden ia etsiago ta
biok geunden tristeago;
pentsatzen nuen "Nere biziko
ilusioa akabo!".
Ospitaletik ospitalera
etsipenari ehun trago;
Gure ametsa ikusten nuen
geroz eta urrunago.
Gaur erantzuna jaso dut eta
parean hain argi dago:
ia ezin det sinetsi baina
azkenean haurdun nago.
Pozik jaso det espero ez nuen
medikuaren partea.
"Anima zaitez!" hamaika aldiz
erraza da esatea
baina zaila da aurpegi onez
erantzun bat ematea
jendeak sarri ez baitu neurtzen
egiten digun kaltea.
Eta gaur begi dizdiratsuz nik
begiratzen det parkea;
a zer nolako lasaitasuna
a zer nolako pakea!
Ta espero det haurdunaldia
behar bezala joatea;
horren baitan da bera eta ni
zoriontsu izatea.
Datu-base honetan eskainitako informazioari buruz jakiteko, kontsultatu lege oharra