BDB Bertsolaritzaren datu-basea

Informazio orokorra

Kategoria

Bat-batekoa

Saioa

2004-01-31 Andoain Lagun-artekoa

Gai-emailea

Goikoetxea, Josu

Bertsolariak / Egileak

Arzallus, Amets

Colina, Sustrai

Lana

Binaka gaia-emanda

Jarritako gaia

Bada bertsoaldi ezagun bat aldamio bat protagonista duena. Xalbador eta Uztapide ziren bertsotan. Gai-jartzaileak aldamio baten gainean jarri zituen. Batek salto egin behar zuen bestea salbatuko bazen. Zuek ere berdin zaudete, baina ez dut zurikeriatan aritzerik nahi.

Deskribapena

Doinua

Txoriak eta txoriburuak

Neurria / Estrofaren izena

Zortziko handia (hg) / Lau puntuko handia (ip)

Kokapena

Kokapena

XDZ - Xenpelar Dokumentazio Zentroa

Bilduma / Funtsa / Proiektua

Bapatean Bilduma

2004-01-31 Andoain Lagun-artekoa [Bertsoa] / Amets Arzallus, Sustrai Colina

Neurria:  Zortziko handia (hg) / Lau puntuko handia (ip) 
Kokapena:  XDZ - Xenpelar Dokumentazio Zentroa 

---

A. Arzallus:
Aldamioan gu tokatzerik
hori ez nuen espero
ta erabaki beharra dago
hontara iritsi ezkero;
ni oraindikan hotz samar nago
oraindik ez nago bero...
lehenbizi salto egin zazu zuk
ta ni joango naiz gero. (bis)

S. Colina:
Nere laguna ez ote dugu
adar-jole nabarmena?
Beraren poza izan nahi luke
nere sendiaren pena.
Barkatu baina ni joatea
ez da gauzarik onena
gu biotan ni izandu bainaiz
atzetik joaten dena. (bis)

A. Arzallus:
Gu biok ere, aizu, kiloak
ez daduzkagu sobera:
nik gutxi dauzkat ta zuk gutxio
hori gutxi gorabehera;
ta horregatik joatekotan
hemen goitikan lurrera
biotako bat salbatzekotan
zu zeu salbatuko zera. (bis)

S. Colina:
Bertso kontutan izaten duzu
mila liskar ta sesio
etxean ere zure amatxok
ai, zenbat amorrazio!
Neskak ez zaitu batere maite
eta keridak gutxio;
beraz gaur bertan hiltzen bazara
ere berdin-berdin dio. (bis)

A. Arzallus:
Baina askotan iniziatiba
zuk izaten duzu Sustrai:
beti diozu "Ni hasiko naiz"
ta ni aldamenean zai;
ni guztiekin haserreturik
ez naiz ez konpontzeko gai
ta horregatik hemen zurekin
ez nuke haserratu nahi. (bis)

S. Colina:
Hementxe gaude luzatu ezinez
gure pausoa aurrera
hementxe bertan buka liteke
gure bizitzen karrera.
Amets saltatu zazu faborez
kamikazeen antzera
aldamioan bakar-bakarrik
aspertu egingo zera. (bis)

A. Arzallus:
Aizu, bakarrik izaten ditut
burutazio ugari;
orain kantatu gai honexeri
hurrena kantatu hari...
hurrengo urtean Bertso Eguna
hurreratzen zaigu ari
ta entrenatzeko aldamiotik
jardungo naiz ni kantari* . (bis)

S. Colina:
Bertso Eguna badator eta
entrenamentu zitala
egin nahi duzu, gutxienean
nik antzeman dizut hala.
Aldamiotik saltatuz gero
eskatzen dudan bezala
zure hiletetan kantatuko dut
zoragarria zinala. (bis)