Bertsos - View details To know more about this section
2022-11-12 Durango Txapelketa [Bertsoa] / Aitor Mendiluze, Julio Soto
| Bertsoa entzun |
2022-11-12 Durango Txapelketa [Bertsoa] / Aitor Mendiluze, Julio Soto
Stanza name:
Zortziko txikia (hg) / Lau puntuko txikia (ip)
Localization:
XDZ - Xenpelar Dokumentazio Zentroa
J. Soto
Non atera zenuen
nobio karneta?
Utziarazi asmoz
neri zigarreta
partxe batzuei jarri
diezu arreta
ez dakit baino nago
pixka bat erreta. (bis)
A. Mendiluze
Laztana barka baina
esazu egia
nola mudatu zaizu
orain aurpegia?
Erreta omen zaude
entzuten det ia
hau da zu erre zeran
lehenengo aldia. (bis)
J. Soto
Lehenbiziko urtean
musu eta musu
egingo ninduzula
beti zoriontsu.
Despistatu samarrik
zabiltza geroz zu
partxeari partxea
ipintzen diozu. (bis)
A. Mendiluze
Erre ordez musua
hau zen apustua
baina bizioak du
guztiz zapuztua.
Aspaldion musua
da juxtu juxtua
Julio ez zait gustatzen
hautsontzi gustua. (bis)
J. Soto
Kea emate´al dizut
nik musu-trukean?
Gozatu bi ezpainoz
ezpainak uztean
gurea apurua
dagoen ustean
puru bat oparitu
hurrengo urtean. (bis)
A. Mendiluze
Tabakoari jarri
diot nik eskela
ez al det garbi utzi
goxoa ez dela?
Ziur partxeek lagun
ahal zaituztela
jarri besoan edo
ahoan bestela. (bis)