Bertsos - View details To know more about this section
1990-06-01 Astigarraga Jaialdia [Bertsoa] / Andoni Egaña, Iñaki Murua
| Bertsoa entzun |
1990-06-01 Astigarraga Jaialdia [Bertsoa] / Andoni Egaña, Iñaki Murua
Stanza name:
Zortziko handia (hg) / Lau puntuko handia (ip)
Localization:
XDZ - Xenpelar Dokumentazio Zentroa
Egaña
Zoriona ta desgraziarekin
hauxe da hau kontrastea,
askotan ustel tokatzen zaigu
guk egindako ustea,
ez ote degu penagarria,
ez ote degu tristea,
zorionaren bila joanda
heriotza trabestea. (BIS)
Murua
Himalayako mendi gainean,
zer zoritxar litekian?
Ari zitzaigun horma igotzen
sasoian bete-betian,
eta hil ziran, gauza bat behintzat
badu une egokian,
hil ziradela, gutxieneko,
maiteen zuten tokian. (BIS)
Egaña
Buelta emanda zori gaiztoak
atzetik zasta puñala,
hara golpetik non geratu zen
hiru hoien eginahala,
nik pentsatzen det nere lagunak
arrazoi puxka duala,
beren ametsa ta hilobia
berbera izan zirala. (BIS)
Murua
Haiek juan dira eta tristuran
arren ez gaitezen amil,
guk badakigu jator zirala
naturazale ta umil,
seguru asko esango dute
egon gaitezela trankil,
naturazale ziraden eta
naturarekin dira hil. (BIS)
Egaña
Zenbaitentzako txoroak dira
ta zenbaitentzako ero,
honelakorik ez det uste nik
jakina da honezkero,
baina malkorik isuritzerik
inork ez beza espero,
beren atseden eta pakea
nunbait topatu ezkero. (BIS)
Murua
Natura zuten askatasuna
berarentzako morrontza,
kale zuloko bizimodua
benetan urri ta hotza,
mendi gailur bat lortze hutsa zen
bizi guztirako poza,
bizia dugu holakoentzat
jolasa ta heriotza. (BIS)