Bertsoak - Fitxa ikusi Atal honi buruz gehiago jakiteko
2001-11-17 Etxarri-Aranatz Txapelketa [Bertsoa] / Amets Arzallus, Maialen Lujanbio
| Bertsoa entzun |
2001-11-17 Etxarri-Aranatz Txapelketa [Bertsoa] / Amets Arzallus, Maialen Lujanbio
Neurria:
Hamarreko handia (hg) / Bost puntuko handia (ip)
Kokapena:
XDZ - Xenpelar Dokumentazio Zentroa
A. Arzallus:
Hainbeste gutun espetxeraino
heldu ziren egun batez,
sendiak zuzen ekarririkan
edo postari bitartez.
Zoritxarrean gutun guztiak
izan dira nere kaltez;
zure eskutan gehiegi zeuden
ta nere eskutan batez;
zuk gorrotoa zabaltzen duzu
amodioaren partez. (bis)
Lujanbio:
Lagun, azkenik iritsi zaizu
irteteko momentua;
orain nahikoa irrifarre ta
algara eta kontua.
Eman ezkero eskutitz hauek
zuretzat zer pekatua!
Horrexegatik ez emateko
erabakia hartua,
ez nuelako gordinagotu
nahi zure sufrimentua. (bis)
A. Arzallus:
Hogei bat urte kondena neuzkan
epailearen epaian,
eta kartzelan hemen egon naiz
sarri negar egin nahian,
berdin ziegako ohe gainean
edo bulegoko mahaian;
elkartasunik ez nuela ta
ez nengon modu lasaian;
ta orain berriz iritsi dira
behar ez diren garaian! (bis)
Lujanbio:
Maitasun hitzak beti onak dira
maitasun hitzak izanik;
behar ez diran garaia denik
ezin nezake esan nik.
Espetxeraino iritsi ziran
hauek nundik edo handik,
maitasun hitzak kuttun gordeta
zuretzat norbaitengandik;
benetakoak baldin baziran,
iraungo dute oraindik! (bis)
A. Arzallus:
Zoritxarrean asko baitira
oraindik preso daudenak,
nere lagunak oraindik hemen
gelditu dira gehienak,
ta nik kalera joateko ditut
kristoren itxaropenak!
Handik bidali behar dizkiet
nik kaleko bizipenak,
ta zuzenean emaizkiezu
nik bidalitako denak. (bis)
Lujanbio:
Bidali ezkero jasoko dute,
ez dizut esango ezetz;
ixkutun bada ere emanez
behin lagun zutenan partez.
Kalera zoaz, ez amorrazi
ta ez egon atsekabez;
etsai naiz baina aholkutxo bat
eman nahi dizut bihotzez:
ez zenuenan damuz ez bizi,
baizik duzunaren pozez. (bis)
Datu-base honetan eskainitako informazioari buruz jakiteko, kontsultatu lege oharra