BDB Bertsolaritzaren datu-basea

Informazio orokorra

Kategoria

Bat-batekoa

Aldizkako Ekitaldia (Saioarena)

Gipuzkoako Bertsolari Txapelketa (7. 2003)

Saioa

2003-11-01 Hernani Txapelketa

Gai-emailea

Azkune, Laxaro

Bertsolariak / Egileak

Gabilondo, Nahikari

Urdangarin, Jose Luis

Lana

Binaka gaia-emanda

Jarritako gaia

Zuek bi jubilatu zarete. Udaletxe azpiko aulkian periodikoa irakurtzen ari zarete. Zuk, Joxe, zuzenean eskelatara jotzen duzu, ezagunik bai ote dagoen. Nahikarik contactos saileko orrira.

Deskribapena

Doinua

Kantatzera nijoa

Neurria / Estrofaren izena

Zortziko txikia (hg) / Lau puntuko txikia (ip)

Kokapena

Kokapena

XDZ - Xenpelar Dokumentazio Zentroa

Bilduma / Funtsa / Proiektua

Txapelketetako Bilduma

2003-11-01 Hernani Txapelketa [Bertsoa] / Nahikari Gabilondo, Jose Luis Urdangarin

Neurria:  Zortziko txikia (hg) / Lau puntuko txikia (ip) 
Kokapena:  XDZ - Xenpelar Dokumentazio Zentroa 

---

J.L. Urdangarin:
Ez dakit zu zabiltzan
burutikan jota
alzheimerra daukazu
edo zaude kolka.
Nik beti begiratzen
det eskelen nota
noiz aterako naizen
beldurrez nago-ta. (bis)

N. Gabilondo:
Betaurrekoak igo
zimurtu kopeta
esan didazu "hara
joan zaigu Joxepa!".
Nik eskelei zergatik
jarri behar arreta?
Haiekin kontakturik
ez nuke nahi-eta. (bis)

J.L. Urdangarin:
Alperrik zabiltzala
hori da kontua
esan beharra dizut
nik gauza juxtua
ez dezula ahaztu behar
daukazun patua:
lurrarekin egingo
dezu kontaktua. (bis)

N. Gabilondo:
Uzteko egin arren
hamaika erregu
kontaktu bila nabil
uda eta negu;
gazteak hartzen ditut
bideko eredu
bizi geran artean
bizi behar degu. (bis)

J.L. Urdangarin:
Nunbait komeniko da
hauxe botatzea:
kontaktuen kontuan
daukazu trantzea.
Komeni omen zaizu
gazte bat hartzea
haiek ere merezi
dute bizitzea. (bis)

N. Gabilondo:
Asko irabazten det
kontaktuen truke
badaukat meriturik
ta nahiko bertute;
gazteentzat ona naiz
aitortu nahi nuke
gerorako zer duten
ikasten baitute. (bis)