Bertsos - View details To know more about this section
2009-11-15 Hendaia Txapelketa [Bertsoa] / Amets Arzallus, Aitor Sarriegi
Bertsoa entzun |
2009-11-15 Hendaia Txapelketa [Bertsoa] / Amets Arzallus, Aitor Sarriegi
Stanza name:
Zortziko handia (hg) / Lau puntuko handia (ip)
Localization:
XDZ - Xenpelar Dokumentazio Zentroa
A. Sarriegi
Beste behin ere negar oihuak
pasa du loaren marra
beste behin ere berpiztu egin zait
lehengo gorputzaldi txarra
ez bada ona ordu hauetan
negarrak entzun beharra
okerrena da gauerokoa
dela haur horren negarra.
A. Arzallus
Ta gaur berri bat gerturatu da
beste gau zaharren ondoren
ai! baina gaurko negarrak dira
minetan minetan goren
negar egin ta "Ama" ta "Ama"
galdezka ari da non den...
Nahiago nuke nik neuk baneki
zure ama nun dagoen!
A. Sarriegi
Azkenaldian egunik egun
dabil malkoen karraio
haurtzaro hori edukitzeko
behin behar ta hala jaio.
Ni benetako ausentziari
zuzendu behar natzaio:
ama falta du ondoan baina
maitasuna falta zaio.
A. Arzallus
Egon liteke lanean edo
egon liteke tabernan
txupete bila ibili naiz ni
azkenean bat atxeman
biberoia ere berotu nahian
hortxe ibili naiz teman
baina amaren maitasunikan
guk ezin diogu eman.
A. Sarriegi
Eman ez arren hor egongo da
gure ahalegin isila
gelditzen saia behar genuke
gaur gaueko iskanbila.
Zeuk esan duzu tabernan pasa
ohi duela ordu pila
txandala jantzi eta banoa
haurraren amaren bila.
A. Arzallus
Esan zaiozu bere haurtxoak
zenbat negar egiten dun
hasieran bi, hiru, lau malko
gero hamar, hogei, ehun...
Baina haurraren adibidea
Aitor har dezagun lagun:
haur bat ekarri baino lehenago
bi aldiz pentsa dezagun.