Bertsoak - Fitxa ikusi   Atal honi buruz gehiago jakiteko

2001-02-04 Urruña Jaialdia [Bertsoa] / Estitxu Arozena, Amets Arzallus, Sustrai Colina, Andoni Egaña, Igor Elortza

Bertsoa entzun  

Informazio orokorra

Kategoria
Bat-batekoa
Saioa
2001-02-04 Urruña Jaialdia
Gai-jartzailea
Aizpurua, Karlos
Soubelet, Xabier
Gai-emailea
Soubelet, Xabier
Bertsolariak / Egileak
Arozena, Estitxu
Arzallus, Amets
Colina, Sustrai
Egaña, Andoni
Elortza, Igor
Lana
Bosnaka gaia-emanda
Jarritako gaia
Aita Saindua zahartzen hasi zaigu eta laster hiltzeko zorian izanen da. Zu, Andoni, Aita Saindua zaitugu, beraz, eta beste bostak Aita Saindugaiak. Zoin diren zuen asmoak, Igorrek hasiz.

Deskribapena

Kokapena

Kokapena
XDZ - Xenpelar Dokumentazio Zentroa
Bilduma / Funtsa / Proiektua
Bapatean Bilduma

2001-02-04 Urruña Jaialdia [Bertsoa] / Estitxu Arozena, Amets Arzallus, Sustrai Colina, Andoni Egaña, Igor Elortza


Kokapena:  XDZ - Xenpelar Dokumentazio Zentroa 


I. Elortza:
Aita Santutzat hauta nazaten
aspaldi egin nintzen apaiz.
Santu-santua ez naiz izango,
baina aita ere ez naiz.

Egaña:
Zu bezelako gizon argalik
kristauak ezin estima,
gorputz horretan ez da kabitzen
ez gorputz ta ez anima!

A. Arzallus:
Barka, Jean Paul Deux, zure ilea
aspalditik eroria,
ta zertarako jantzi ohi duzu
beraz kapelu xuria?

Egaña:
Hau gazte eta adar-jotzaile,
ze tamala ta ze pena!
Ez dakit ongi esan al duzun
matrikularen izena.

E. Arozena:
Hauteskundeetan erdiak neskak
izan dezagun pakea,
aizu, posible al litzateke
Ama Saindu izatea?

Egaña:
Ama Saindurik ez dugu izan
ez orain ta ez lehenago,
baina ama birjin izan zintezke,
postu hori libre dago.

Colina:
Jesukristoren arima daukat
nere barnean gordea,
eta gainera bisaian badut
gaixo baten kolorea.

Egaña:
Oraindik ere gazte zera zu,
egia garbi esanda.
Ai, gizarajo, zuk aski duzu
seminariora joanda!

I. Elortza:
Argala baina gogorra naiz ta
neu jarri nazazu goarda.
Fedez mundua eskastxo dabil
ta esku gogorra behar da!

Egaña:
Ez zaite joan, hurbildu zaite,
zurekin doa kontua.
Orain memoriz esan zaidazu
laugarren mandamentua.

I. Elortza:
Kopla batekin erantzungo dut
Aita Santuak uler dezan,
memoriz esan behar den hori
hitzez ezin baita esan.

Egaña:
Hau Aita Santu ez dut jarriko,
ez baitaki deus esaten.
Gainera ez daki makurtu eta
lurrari muxu ematen!

A. Arzallus:
Mandamenturik ez dakit baina
nik merezi dut saria:
mutil gaztea eta prestua,
gainera bertsolaria!

Egaña:
Zu Aita Santu kaxkarra zera,
hori da nere ustea.
Hau falta zaigu: Aita Santua
kirol prakekin jaztea!

E. Arozena:
Lehengora bueltan, gogoa badut
ama birjin izateko,
baina zuk ba al duzu indarrik
mirariak egiteko?

Egaña:
Nik erantzuna emango dizut,
nahiz ta ez den atsegina:
zu ama birjin bihurtzea da
milagrorikan haundina.

Colina:
Ai, Aita Santu, Jeinkotzat zaitut,
gorroto dut pekatua,
eta gainera ederki dakit
seigarren mandamentua!

Egaña:
Gizarajo hau zintzoa dugu
eta hori da kontua,
usu gauza berbera baitugu
zintzoa eta tontua!

I. Elortza:
Gaur nere begiz ikus dezaket
askok esaten duena,
deabrua dela Aita Santuan
kapela jantzi zuena.

Egaña:
Beraz antiaju eta guzti
jardun da neri begira.
Hau zoritxarra, kapel gainetik
adarrak ikusten dira!

A. Arzallus:
Egokiena ni nauzu berriz
ta heldu nauzu kantura;
Jesusen seme ameslaria
ta deabruan itxura.

Egaña:
Zuk Jesukriston papera ere
egingo duzu dotore;
pisua ere ez duzu asko
gurutzean jartzeko're!

E. Arozena:
Lehenago ere aritu gara
mandamenduak emanez;
seigarrena zein den badakigu,
baina laugarrenikan ez.

Egaña:
Neronek ere ez dut gogoan,
zenbat pena, zenbat damu!
Ordezkorikan ez nuke behar
memoria ona banu!

Colina:
Hiru hauek protestante dira,
ez dago esan beharrik;
Aita Santuai egin diote
protesta latza bakarrik.

Egaña:
Hauen artean bat aukeratzen
alperrikan eginahala;
ni banijoa zerurantz eta
Jainkoak hauta dezala!

Datu-base honetan eskainitako informazioari buruz jakiteko, kontsultatu lege oharra